సేవా పథంలో ‘విజయ చిత్ర’ ఎడిటర్ గుర్రపు విజయకుమార్ జన్మదినం వేళ ఆదర్శనీయమైన అన్నదాన కార్యక్రమాలు
హైదరాబాద్: నిర్మాత, “విజయ చిత్ర” ఎడిటర్ గుర్రపు విజయకుమార్ తన జన్మదినాన్ని ఆడంబరాలకు దూరంగా, సేవా కార్యక్రమాల మధ్య జరుపుకొని తన ఉదారతను చాటుకున్నారు. సమాజం పట్ల బాధ్యత కలిగిన వ్యక్తిగా, తన పుట్టినరోజున ఆపన్నులకు అండగా నిలవడమే నిజమైన సంతోషమని ఆయన నిరూపించారు.
వృద్ధుల మధ్య కేక్ కటింగ్.. ఆత్మీయ అన్నదానం
కూకట్పల్లి, ఆల్విన్ కాలనీలోని రాజేశ్వరి ఓల్డేజ్ హోమ్లో విజయకుమార్ తన జన్మదిన వేడుకలను అత్యంత ఆత్మీయంగా జరుపుకున్నారు. అక్కడ నివసిస్తున్న 50 మంది వృద్ధుల మధ్య కేక్ కట్ చేసి, వారితో కాసేపు సమయాన్ని గడిపిన అనంతరం వారికి తన స్వహస్తాలతో భోజనాలు వడ్డించి, వృద్ధుల ఆశీర్వాదాలు అందుకున్నారు. అనాథలుగా ఉన్న తమను ఓ కొడుకులా వచ్చి పలకరించడంపై వృద్ధులు హర్షం వ్యక్తం చేశారు. ఈ కార్యక్రమంలో దర్శకుడు శ్రీనివాస్ నేదునూరి, రాజేశ్వరి ఓల్డేజ్ హోం నిర్వాహకురాలు రాజేశ్వరి పాల్గొని గుర్రపు విజయ్ కుమార్ వ్యక్తిత్వాన్ని, గొప్ప మనసును కొనియాడి చిరు సత్కారం చేశారు.
ప్రత్యేక అవసరాలు గల పిల్లలకు అండగా..
అదేవిధంగా, ‘నిర్యాన్ అసోసియేషన్ ఫర్ ది ఇంటిలెక్చువల్లి డిసేబుల్డ్’ వొకేషనల్ ట్రైనింగ్ సెంటర్లో 30 మంది ప్రత్యేక అవసరాలు గల వ్యక్తులకు ఆహార దానం చేశారు. ఈ సందర్భంగా గుర్రపు విజయకుమార్ మాట్లాడుతూ.. సమాజంలో వెనుకబడిన, కష్టాల్లో ఉన్న వారికి సాయం చేయడంలోనే పరమార్థం ఉందని తెలిపారు. ఇలాంటి సేవా కార్యక్రమాలు భవిష్యత్తులో మరింత విస్తృతంగా నిర్వహిస్తానని ఆయన పేర్కొన్నారు.
ఈ కార్యక్రమంలో ప్రముఖ నటుడు విజయ్ భాస్కర్ కూడా పాల్గొని గుర్రపు విజయకుమార్ను అభినందించారు.
నిర్మాతగా, ఎడిటర్గా సినీ రంగంలో బిజీగా ఉన్నప్పటికీ, సామాజిక బాధ్యతను మర్చిపోకుండా ఆయన చేస్తున్న ఈ కార్యక్రమాలు పలువురికి స్ఫూర్తిదాయకంగా నిలుస్తున్నాయి.
